AFPRA sot ka vizituar shërbimin e  MZSH-së në Berat i cili tashmë ka kaluar në një standart më të lartë me ambiente të rikonstruktuara, ku ofrohet shërbim bashkohor dhe modern si dhe me automjete të kohës.

Me ndihmën e VAFFFA-Austri, bëmë të mundur dhurimin e një sasie veshje zjarrduruese dhe helmeta për efektivin në përpjekje për të rritur kapacitetet e shërbimeve të MZSH-së dhe krijimin e atyre vullnetare. 

Nga diskutimet me efektivin e palodhur të këtij stacioni ngelet problematike ndërhyrja e mjeteve të mëdha zjarrfikëse në zonën muzeale të kalasë ku me atë rast AFPRA dhuroi dhe një pompë Albin me kapacitet 200 l/min dhe presion deri në 12 bar.

Me iniciativë të pjestares së AFPRA First Aid Team, zj Teuta Bilçari sëbashku me Drejtorin e MZSH-së Berat z.Artan Merko si dhe përfaqësuesit e shoqatës sonë vizituam shkollën ” Ylli i Mëngjesit ”duke biseduar për zhvillimin e disa aktiviteteve të përbashkëta stërvitore sensibilizuese në të ardhmen.

Pjesë e vizitës sonë në Berat ishte dhe ”Qendra Lira” e personave me aftësi të kufizuara ku drejtuesja shumë e motivuar e këtij institucioni, zj Alma Kule na tregoi ambjentet e saj ku dukej qartë një punë dhe frymë shumë pozitive.

Bashkë me drejtuesen e këtij institucioni u diskutua për mundësinë e sigurimit nga donatorë potencialë të një mjeti të përshtatshëm për transportin e këtyre personave gjë të cilën ata e kanë shumë të domosdoshme në punën e tyre të përditshme.

Në vizitën e AFPRA-s në stacionin e MZSH-së Dimal, gjetëm mikpritjen e ngrohtë dhe falenderimet e pjestarëve të tij e veçanërisht të drejtuesit z. Myfit Senko, të cilët ishin shumë mirënjohës për vizitën si dhe suportin me mjetet e pajisjet zjarrduruese për efektivin të cilët me vështirësi qëndrojnë gjithmonë në gatishmëri të qytetarëve.

Këto materiale u mundësuan falë miqve tanë austriakë të VAFFFA-s Austri.

Një premtim i dhënë për shërbimin e MZSH-së Kuçovë u realizua këtë herë me dhurimin e një pajisje hidraulike për aksidentet rrugore. Pajisja e mundësuar nga shërbimet homologe suedeze me pak përkushtim dhe punën e palodhur të efektivit të këtij stacioni, shumë shpejt do të jetë në gjëndje pune gati për tu përballur me situatat e vështira.

Është impresionuese përpjekja e jashtëzakonshme e drejtuesve dhe e të gjithë këtij shërbimi në këtë stacion për mirëmbajtjen e kontrollin në çdo moment të teknikës për të ruajtur gatishmërinë e tyre.

Vijon shpërndarja e pajisjeve në ndihmë të shërbimeve të MZSH-së, këtë rradhë në qytetin e Durrësit me pajisje të radiondërlidhjes për të lehtësuar komunikimin si dhe sinjalizues pamor dhe zanor me drita vezulluese blu për mjetet e shërbimit.

Patëm mundësinë të takonim efektivin që ishte në shërbim me në krye drejtorin e ri të këtij shërbimi z. Shkëlqim Troplini, ku biseduam ndër të tjera për krijimin e shërbimit vullnetar, si dhe u informuam mbi nevojat në pajisje dhe mjete.

Morën pjesë në këtë takim kryetari i shoqatës AFPRA z. Alban Laçi, n/kryetari i kësaj shoqate z. Eduard Tafmizi si dhe drejtori ekzekutiv z. Vaso Peja.

Më datën 22.10.2021 në mbledhjen e Komitetit Drejtues of CFPA-E (Confederation of Fire Protection Associations Europe) që u zhvillua në Athinë, u shqyrtua kërkesa e shoqatës AFPRA dhe më pas u vendos anëtarësimi saj në këtë konfederatë. Në këtë eveniment morën pjesë drejtuesit e shoqatës AFPRA kryesuar nga z Alban Laçi dhe z Vaso Peja të cilët prezantuan historikun, arritjet, anëtarësinë si dhe objektivat e saj.

Konfederata e Shoqatave Europiane të Mbrojtjes nga Zjarri (CFPA-E) është organizata më përfaqësuese e shoqatave të mbrojtjes nga zjarri ne Europë, me fokusin primar shkëmbimin e njohurive dhe të kuptuarit e çështjeve që lidhen me shkencën e zjarrit, parandalimin dhe mbrojtjen nga zjarri, sigurinë dhe rreziqet e tjera të lidhura, ku Shqipëria për herë të parë është pjesë e saj në nivel organizate kombëtare nëpërmjet shoqatës AFPRA.

Bashkëpunimi i AFPRA-s me CFPA-E do të jetë afatgjatë dhe shumë shpejt do të fillojë publikimi i udhëzimeve të kësaj organizate sipas standartit europian, në gjuhën shqipe, për të vazhduar më pas me trajnimet e harmonizuara në fushën e mbrojtjes nga zjarri, parandalimit dhe sigurisë.