Në qershor 2025, SDIS 66 i dhuroi Shoqatës AFPRA një autoçisternë zjarrfikëse 4x4, në kuadër të forcimit të kapaciteteve operacionale të saj.

Ndër të tjera, mjeti shërbeu për një muaj pranë MZSH-së Gramsh, duke ndihmuar në menaxhimin e disa zjarreve gjatë sezonit veror.

Në tetor 2025, Kryetari i AFPRA-s, z. Alban Laçi dhe Shefi i MZSH-së Gramsh, z. Ilir Llapushi, zhvilluan një vizitë pune pranë SDIS 66, ku u pritën me ngrohtësi nga kolegët francezë.

Gjatë vizitës u njohën nga afër me organizimin, mënyrën e funksionimit dhe teknologjinë moderne të shërbimit zjarrfikës francez, si dhe u zhvilluan takime me drejtues dhe ekipe operacionale të ndryshme.

Në përfundim, delegacioni shqiptar u prit nga Drejtori i Shërbimit të Mbrojtjes nga Zjarri dhe Shpëtimit të Rajonit të SDIS 66, Kolonel Éric Belgeoino, i cili vlerësoi bashkëpunimin e deritanishëm dhe kontributin e AFPRA-s në forcimin e kapaciteteve zjarrfikëse në Shqipëri.

U diskutuan gjithashtu mundësi të reja për bashkëpunim në trajnime, shkëmbim përvojash dhe rijetëzim të teknikës zjarrfikëse, për t’i dhënë një jetë të dytë mjeteve franceze në shërbim të bashkive shqiptare me më shumë nevoja.

Falënderime të veçanta për miqtë tanë të SDIS 66 për mbështetjen, profesionalizmin dhe gatishmërinë për të ndarë përvojën e tyre me Shqipërinë dhe AFPRA-n.

Gjatë kësaj jave, AFPRA – Shoqata Shqiptare për Mbrojtjen nga Zjarri dhe Shpëtimin, zhvilloi në ambientet e Bazës Ajrore Farkë trajnimin bazik për efektivin zjarrfikës.

Ky trajnim u realizua falë bashkëpunimit të ngushtë me Komandën e Bazës Ajrore Farkë dhe përkushtimit të veçantë të komandantit, nënkolonel Ervin Buzi, i cili ka treguar vëmendje të veçantë për forcimin e kapaciteteve të sektorit të MZSH-së, i cili është një komponent jetik për sigurinë e kësaj bazës.

Gjatë trajnimit, pjesëmarrësit u pajisën me njohuri teorike dhe aftësi praktike mbi reagimin ndaj zjarreve, përdorimin e automjeteve dhe pajisjeve tekniko-zjarrfikëse, si dhe zhvillimin e aftësive operacionale në përputhje me standardet më të mira ndërkombëtare.

Në kuadër të këtij bashkëpunimi, ekipi i AFPRA pati gjithashtu mundësinë të shkëmbejë përvoja me pilotët e helikopterëve të Bazës Ajrore, duke ndarë perspektivat respektive mbi sfidat e ndërhyrjeve gjatë zjarreve në pyje. Ky dialog kontribuoi në kuptimin më të mirë të nevojave të ndërsjella mes ekipeve tokësore dhe atyre ajrore.

Shoqata AFPRA falënderon të gjithë pjesëmarrësit për angazhimin dhe seriozitetin e treguar dhe mbetet e gatshme të vijojë mbështetjen për rritjen e kapaciteteve në çdo strukturë që i shërben sigurisë publike.

Forcimi i sektorit të MZSH është investim për sigurinë kolektive!

Me rastin e përfundimit të projektit “Trajnimi i Zjarrfikësve Shqiptarë të Shërbimit të Mbrojtjes nga Zjarri dhe Shpëtimi të 10 bashkive”, shoqata AFPRA organizoi një ceremoni falenderimi në Drejtorinë e MZSH-së Bashkia Durrës , me pjesmarrjen e përfaqësueve nga Ambasada e Polonisë z Tomasz Fraczkiewicz dhe UNDP z Francisco Roquette, nga DPMZSH z Arben Cara si dhe pjesmarrës të tjerë, ku me atë rast u shpërndanë dhe çertifikatat e trajnimit për shërbimin e MZSH-së pranë kësaj bashkie.

Me përfaqësuesit e Ambasadës së Polonisë u diskutua dhe për mundësinë e projekteve të tjera në të ardhmen me shoqatën AFPRA si pjesë e kontributit të saj për një mjedis sa më të sigurtë.  

Pjesë e kontributit që AFPRA jep në vazhdimësi për institucionet publike të MZSH-së, sot ishte AZM – Qarku Fier. Drejtuesi i përkushtuar i këtij institucioni pranë parkut Divjakë, z Ardian Koçi dhe z Alban Laçi diskutuan rreth nevojave për sa i përket logjistikës së MZSH-së në këtë sektor në përmbushje të detyrimit ligjor për zonat e mbrojtura sipas VKM përkatëse si dhe mundësisë së shoqatës sonë për të kontribuar në përballimin e sfidave.

Një ndihmë modeste me veshje dhe pajisje zjarrduruese dhe komunikimi ju dhuruan me këtë rast pjestarëve të ekipit të MZSH-së së këtij institucioni duke shënuar kështu dhe fillimin e një bashkëpunimi të ngushtë në të ardhmen.