Shoqata AFPRA, përmes një grupi të anëtarëve të saj që punojnë në shërbimet zjarrfikëse të vendeve të Bashkimit Europian, zhvilloi një takim pune me Ministrin e Brendshëm, z. Besfort Lamallari, dhe Drejtorin e Përgjithshëm të MZSH-së, Drejtues i Parë Zjarrfikës Ervis Gjoshi.

Diskutuam për hartimin e ligjit të ri, zhvillimin profesional të Shërbimit dhe kontributin e ekspertizës shqiptare në diasporë. Synimi është një model shqiptar që përshtat praktikat më të mira europiane me nevojat e vendit, duke ndërtuar mbi dijen, literaturën dhe traditën profesionale të krijuar ndër dekada nga brezat e zjarrfikësve.

Shqipëria ka zjarrfikës të përkushtuar, që meritojnë një sistem që i mbron, i trajnon, i pajis dhe i vlerëson në lartësinë e përgjegjësisë që mbajnë.

Mirëpresim angazhimin e Ministrit për përfshirjen e profesionistëve shqiptarë brenda dhe jashtë vendit në këtë proces: “Dera është e hapur për çdo kontribut shqiptar, kudo që ndodhet.”

AFPRA e mbështet këtë nismë dhe është e gatshme të kontribuojë me ekspertizën dhe përvojën e anëtarëve të saj.

Ftojmë profesionistët shqiptarë në diasporë të fushës së mbrojtjes nga zjarri, shpëtimit dhe mbrojtjes civile, që kanë mundësi dhe dëshirë të kontribuojnë, t’i bashkohen AFPRA-s. Së bashku mund ta kthejmë përvojën individuale në punë të organizuar për vendin.

Pas nënshkrimit të Memorandumit të Bashkëpunimit ndërmjet AFPRA – Albanian Fire Protection and Rescue Association dhe @fire International, bashkëpunimi ynë hodhi një hap tjetër të rëndësishëm: vizitën e parë të partnerëve tanë nga Gjermania në Shqipëri.

Në postimin tonë të mëparshëm shkruam se shumë shpejt prisnim vizitën e kthimit të miqve tanë, në mënyrë që edhe ata të njiheshin nga afër me terrenin, natyrën dhe potencialin që vendi ynë ofron në fushën e mbrojtjes nga zjarri dhe shpëtimit. Këtë herë, ata patën mundësinë ta shihnin Shqipërinë nga afër.

Gjatë vizitës, AFPRA prezantoi partnerët e @fire International me bashki, shërbime vendore të Mbrojtjes nga Zjarri dhe Shpëtimit, si dhe aktorë të tjerë institucionalë, duke u dhënë atyre një pasqyrë reale mbi kushtet, sfidat dhe nevojat konkrete në terren. Partnerët tanë patën gjithashtu mundësinë të vizitonin një vatër zjarri, ku panë nga afër karakteristikat e terrenit, mënyrën e ndërhyrjes dhe rëndësinë që kanë kapacitetet e përgatitura, të koordinuara dhe të integruara me sistemin ekzistues të MZSH-së.

Një moment shumë i rëndësishëm i kësaj vizite ishte takimi me Drejtorinë e Përgjithshme të Mbrojtjes nga Zjarri dhe Shpëtimit dhe Drejtorin e Përgjithshëm, ku AFPRA dhe @fire International prezantuan vizionin dhe planet e përbashkëta për të ardhmen. Në këtë takim u theksua qartë se çdo iniciativë e përbashkët do të zhvillohet në përputhje me kuadrin ligjor në fuqi, në koordinim me institucionet përgjegjëse dhe me qëllim të vetëm: fuqizimin e sistemit të Mbrojtjes nga Zjarri dhe Shpëtimit në Shqipëri.

Për AFPRA-n, ky bashkëpunim nuk është thjesht një marrëdhënie ndërkombëtare në letër. Është një mundësi konkrete për të sjellë eksperiencë, trajnime, modele organizimi dhe mbështetje praktike, duke i përshtatur ato me realitetin shqiptar dhe duke i vendosur në shërbim të institucioneve dhe komuniteteve tona.

Falënderojmë partnerët tanë nga @fire International për seriozitetin, përkushtimin dhe gatishmërinë për të njohur nga afër realitetin shqiptar, si dhe të gjitha institucionet, bashkitë dhe shërbimet vendore që mirëpritën këtë vizitë dhe ndanë eksperiencën e tyre.

🤝 Zjarret nuk njohin kufij, dhe as bashkëpunimi në luftën kundër tyre.

Së bashku, nga përvoja në veprim, për një sistem më të fortë, më të përgatitur dhe më të koordinuar të Mbrojtjes nga Zjarri dhe Shpëtimit në Shqipëri.

Për herë të parë në Shqipëri, Shoqata AFPRA, nëpërmjet anëtarit të saj z. Grei Papa, prezantoi dokumentarin “Blaulicht Albanien” – një projekt i veçantë që sjell në vëmendje zhvillimin, sfidat, përkushtimin dhe profesionalizmin e Shërbimit të Mbrojtjes nga Zjarri dhe Shpëtimit në vendin tonë.

Ky dokumentar nuk është vetëm një pasqyrim filmik. Ai është një dëshmi e punës së përditshme, sakrificës dhe përgjegjësisë së efektivëve të MZSH-së, të cilët qëndrojnë në vijën e parë për mbrojtjen e jetës, pronës dhe mjedisit.

Realizimi i tij u bë i mundur falë bashkëpunimit dhe mbështetjes së Drejtorisë së Përgjithshme të Mbrojtjes nga Zjarri dhe Shpëtimit, Bashkia Tiranë dhe strukturave të saj, duke krijuar një urë të rëndësishme komunikimi me publikun shqiptar dhe atë ndërkombëtar.

📍 Dokumentari u shfaq në kuadër të aktivitetit:

“Nga Përvoja në Veprim – Forcimi i Bashkëpunimit Shqiptaro-Gjerman dhe Ndërkombëtar në Mbrojtjen nga Zjarri, Shpëtimin dhe Mbrojtjen Civile”

Aktiviteti u zhvillua më dt 3 korrik 2026, në ambientet e Ambasadës së Republikës Federale të Gjermanisë në Tiranë, nën kujdesin e z. Stefan Dorbach me pjesëmarrjen midis të tjerëve edhe të përfaqësuesve nga DPMZSH, AKMC, QKUM, Ambasada e Polonisë, Ambasada e Japonisë, Ambasada e Austrisë, Banka Botërore, GIZ, si dhe të partnerëve të tjerë kombëtarë dhe ndërkombëtarë.

Ky takim shërbeu si një platformë e rëndësishme për prezantimin e përvojave konkrete të bashkëpunimit, shkëmbimin e praktikave të mira dhe diskutimin e mundësive për zhvillimin e partneriteteve dhe projekteve të reja në fushën e mbrojtjes nga zjarri, shpëtimit dhe mbrojtjes civile.

Për AFPRA-n, ky moment përfaqëson më shumë se një premierë dokumentari. Ai është një tjetër hap në drejtim të promovimit të vlerave të shërbimit zjarrfikës shqiptar, forcimit të bashkëpunimit ndërkombëtar dhe ndërtimit të urave të reja mes institucioneve, partnerëve dhe profesionistëve që ndajnë të njëjtin qëllim: një sistem më të fortë, më të përgatitur dhe më të vlerësuar të mbrojtjes nga zjarri dhe shpëtimit në Shqipëri.

🤝 Falenderojmë të gjithë institucionet, partnerët dhe të pranishmit që kontribuan në realizimin dhe mbështetjen e këtij aktiviteti.

Në kuadër të bashkëpunimit të vazhdueshëm që AFPRA ka ndërtuar me partnerë dhe miq nga Austria dhe Gjermania, me profile dhe nga fusha të ndryshme, por të bashkuar nga i njëjti qëllim, lufta kundër zjarreve dhe shpëtimi i jetës; u realizua një tjetër kontribut për forcimin e mëtejshëm të kapaciteteve të Shërbimit Zjarrfikës Gramsh, përmes mbështetjes me logjistikë dhe pajisje teknike zjarrfikëse.

Gjatë ceremonisë së organizuar në Gramsh, në shenjë respekti dhe mirënjohjeje, AFPRA dorëzoi një certifikatë mirënjohjeje për "Lions Club Mühldorf-Waldkraiburg", si lokomotiva e kësaj mbështetjeje.

AFPRA shpreh vlerësimin për të gjithë ata që kontribuojnë në iniciativa konkrete dhe të koordinuara me nevojat dhe mundësitë reale të shërbimeve zjarrfikëse, me një qëllim të përbashkët: forcimin e shërbimeve zjarrfikëse dhe rritjen e sigurisë për çdo shtetas, vendas dhe të huaj.

Por përtej çdo donacioni, ky është edhe një moment reflektimi. Mbështetja nga partnerët dhe miqtë është e çmuar, por sistemi i mbrojtjes nga zjarri dhe shpëtimit nuk mund të mbështetet vetëm mbi donacione. Ai ka nevojë për investime të qëndrueshme, planifikim afatgjatë, pajisje moderne, trajnim të vazhdueshëm dhe vëmendje institucionale në çdo nivel.

AFPRA do të vijojë të jetë një urë bashkëpunimi mes partnerëve ndërkombëtarë dhe shërbimeve zjarrfikëse në vend, por qëllimi ynë mbetet më i madh: forcimi real dhe i qëndrueshëm i të gjithë sistemit të mbrojtjes nga zjarri dhe shpëtimit në Shqipëri.

🤝 Kur bashkëpunimi kthehet në veprim, përfiton i gjithë komuniteti

Një tjetër projekt zhvillimor i AFPRA, i mbështetur nga Ambasa e Polonisë dhe PolishAid, u përmbyll me sukses duke forcuar më tej bazat për zhvillimin e Qendrës së Trajnimit për Zjarrfikësit në Shqipëri.

Projekti përfshiu pajisje teknike zjarrfikëse, simulator për “Hyrjen me Forcë”, si dhe trajnimin e trajnerëve mbi temat “Hyrja me Forcë” dhe “Mbijetesa e Zjarrfikësit”.

Trajnimi i parë u zhvillua pranë Bashkisë Kamëz, në praninë e Ambasadorit të Polonisë Sh.T.Z. Wojciech Unolt, duke treguar se bashkëpunimi ndërkombëtar, përkushtimi lokal dhe angazhimi vullnetar mund të sjellin zhvillim real për shërbimin e MZSH-së.

Mirënjohje për taksapaguesit polakë, PolishAid dhe Ambasadën e Polonisë për mbështetjen e vazhdueshme ndaj rritjes së sigurisë publike në Shqipëri.

Ftojmë të gjitha strukturat e MZSH-së dhe institucionet e tjera të sigurisë të na kontaktojnë për trajnim dhe bashkëpunim në këto tema.