Në kuadër të bashkëpunimit me Bashkinë Klos, AFPRA realizoi sot dhurimin e disa pajisjeve zjarrfikëse për Shërbimin Zjarrfikës në Klos, me synim rritjen e sigurisë dhe forcimin e gatishmërisë për ndërhyrje në raste emergjente. Kjo mbështetje vjen si një kontribut konkret për përmirësimin e kapaciteteve operacionale dhe garantimin e një reagimi sa më të shpejtë, të koordinuar dhe efikas në shërbim të komunitetit.

Pajisjet e dhuruara do të ndihmojnë në lehtësimin e punës së efektivëve në terren, duke rritur mundësitë për ndërhyrje më të sigurta dhe më të efektshme, si në rastet e zjarreve ashtu edhe në situata të tjera emergjente. Për AFPRA, forcimi i strukturave lokale të reagimit mbetet një prioritet, pasi është pikërisht reagimi i parë në kohë ai që shpesh bën diferencën në mbrojtjen e jetës dhe pasurisë së qytetarëve.

📌 Gjatë takimit u diskutua gjithashtu mundësia e organizimit të trajnimeve për efektivin zjarrfikës, ku AFPRA, me mbështetjen e Bashkisë Klos, mund të kontribuojë në rritjen e aftësive profesionale, shkëmbimin e praktikave më të mira dhe përgatitjen për menaxhimin e situatave të ndryshme emergjente në mënyrë sa më profesionale.

🔎 Po ashtu, u trajtuan edhe mundësi të tjera bashkëpunimi në të ardhmen, me fokus në iniciativa që lidhen me sigurinë publike, emergjencat civile, rritjen e ndërgjegjësimit dhe forcimin e kapaciteteve në nivel lokal. Qëllimi ynë është që ky të jetë një bashkëpunim i qëndrueshëm, i cili sjell rezultate të prekshme dhe përfitime direkte për qytetarët.

🤝 Faleminderit Bashkisë Klos dhe Shërbimit Zjarrfikës për bashkëpunimin dhe angazhimin e tyre.

Në qershor 2025, SDIS 66 i dhuroi Shoqatës AFPRA një autoçisternë zjarrfikëse 4x4, në kuadër të forcimit të kapaciteteve operacionale të saj.

Ndër të tjera, mjeti shërbeu për një muaj pranë MZSH-së Gramsh, duke ndihmuar në menaxhimin e disa zjarreve gjatë sezonit veror.

Në tetor 2025, Kryetari i AFPRA-s, z. Alban Laçi dhe Shefi i MZSH-së Gramsh, z. Ilir Llapushi, zhvilluan një vizitë pune pranë SDIS 66, ku u pritën me ngrohtësi nga kolegët francezë.

Gjatë vizitës u njohën nga afër me organizimin, mënyrën e funksionimit dhe teknologjinë moderne të shërbimit zjarrfikës francez, si dhe u zhvilluan takime me drejtues dhe ekipe operacionale të ndryshme.

Në përfundim, delegacioni shqiptar u prit nga Drejtori i Shërbimit të Mbrojtjes nga Zjarri dhe Shpëtimit të Rajonit të SDIS 66, Kolonel Éric Belgeoino, i cili vlerësoi bashkëpunimin e deritanishëm dhe kontributin e AFPRA-s në forcimin e kapaciteteve zjarrfikëse në Shqipëri.

U diskutuan gjithashtu mundësi të reja për bashkëpunim në trajnime, shkëmbim përvojash dhe rijetëzim të teknikës zjarrfikëse, për t’i dhënë një jetë të dytë mjeteve franceze në shërbim të bashkive shqiptare me më shumë nevoja.

Falënderime të veçanta për miqtë tanë të SDIS 66 për mbështetjen, profesionalizmin dhe gatishmërinë për të ndarë përvojën e tyre me Shqipërinë dhe AFPRA-n.

Për vitin 2025, shërbimi MZSH-së Tropojë hapi siparin e aktiviteteve të AFPRA.

Me ndihmën e çmuar të shoqatave IFRA-Skoci e VAFFFA-Austri, e gjithashtu me mbështetjen e Ambasadës Britanike në Tiranë dhe Projektit “Perspektiva të reja”, shoqata AFPRA dhuroi për shërbimin e këtij qyteti një sasi ndihmash materiale zjarrfikëse.

Në këtë ceremoni morën pjesë drejtuesi i MZSH-së z Fatmir Rexhaj dhe ekipi i tij, kryetari i AFPRA z Alban Laçi e drejtori i AKMC për rajonin e veriut z Besnik Hysaj.  

Pjesë e këtij aktiviteti  ishte dhe përfaqësuesi i Ambasadës Britanike në Tiranë z Nathan Dann dhe kordinatori projektit z Vasyl Chornyi.

Nga të pranishmit u vlerësua lart ndihma e shoqatave simotra dhe nga të ftuarit u shpreh dëshira për të kontribuar në rritjen e kapaciteteve të këtij shërbimi për t’u përballur me sukses sfidat e punës së përditshme.

Falë kontributit të qeverisë dhe taksapaguesve të Japonisë, shoqata AFPRA mundësoi sigurimin e një mjeti të ri zjarrfikës për shërbimin e MZSH-së në Gramsh.

Në ceremoninë e organizuar për këtë qëllim në këtë bashki, morën pjesë ambasadorja japoneze në vendin tonë zj Kato, kryetari i bashkisë z Besian Ajazi, kryetari i AFPRA z Alban Laçi, zjarrfikësit e ketij qyteti me drejtuesin e palodhur z Ilir Llapushi e shumë të ftuar të tjerë.

Ju faleminderit të nderuar miq japonezë për ndihmën tuaj !

AFPRA vazhdon misionin e saj në mbështetje të punonjësve të shërbimeve të MZSH-së me dhurimin e 32-të kësaj rradhe në Bashkinë Bulqizë.

Anëtarë të AFPRA por edhe kolegë të shërbimit të MZSH-së Bashkia Tiranë të cilët ju bashkuan grupit vullnetarisht, pas dorëzimit të pajisjeve diskutuan për problematikat e përbashkëta si dhe raste të ndryshme që kanë pasur, dhe më pas në terren, shkëmbyen eksperiencën në teknika të ndryshme të përdorimit të pompës zjarrfikëse.

Falë mbështetjes së pa kursyer nga shoqata simotër VAFFFA Austri dhe miqve të AFPRA në Suedi dhe Finlandë është bërë e mundur mbërritja e një sasie tjetër pajisjesh të cilat do të shpërndahen si gjithmonë në koordinim me DPMZSH me përparësi ato stacione ku ka nevojë më urgjente.

AFPRA nxit organet përgjegjëse të kujdesen për punonjësit dhe këtë shërbim shumë jetik për shoqërinë.